Samfélag og umhverfi

Samfélagsábyrgð félagsins skiptist í þrjú áherslusvið; sameiginlegt virði, sjálfbærni og hlítni. Áhersla er lögð á að hámarka jákvæð áhrif á umhverfið og samfélagið í heild og skapa þannig sameiginlegt virði fyrir félagið og alla hagsmunaaðila. Lögð er áhersla á aukna sjálfbærni og lagt upp úr því að halda jafnvægi á milli efnahags, umhverfis og samfélags í rekstrinum auk þess sem starfað er í hlítni við íslensk lög, reglur og almenn viðmið.

Sem dæmi um árangur af stefnu félagsins í þessum efnum má nefna víðtæka vottun skv. ISO 27001 staðlinum sem félagið undirgengst árlega. Sýn hf. lauk nú í lok nóvember vottunarferli félagsins samkvæmt vinnuverndarstaðlinum ISO 45001 og er fyrst íslenskra fyrirtækja til að fá vottunina samkvæmt nýrri útgáfu staðalsins. 

Stefna Sýnar hf. er að gæta jafnréttis á öllum sviðum

Jafnréttismál eru félaginu hugleikin og gætt er að því að starfsfólki sé ekki mismunað á grundvelli kynferðis, kynþáttar, þjóðernis, kynhneigðar, aldurs, trúar, skoðana og annarra þátta. Að þessu leyti geymir jafnréttisáætlun stefnu félagsins í mannréttindamálum. Umburðarlyndi er ríkjandi þáttur í samskiptum á vinnustaðnum. Jafnréttisnefnd er starfrækt innan fyrirtækisins auk þess sem fyrirtækið hefur markað sér jafnréttisáætlun í samstarfi við Jafnréttisstofu.

Umhverfismál

Sýn hefur sett sér ákveðin markmið í umhverfis- og loftslagsmálum sem eru til þess fallin að draga úr mengun og hafa þannig jákvæð áhrif á vistspor félagsins. Sýn hf. skrifaði undir loftslagsyfirlýsingu FESTU og Reykjavíkurborgar um markmið í loftslagsmálum og hefur einnig einsett sér að efla vistvænar samgöngur, draga úr myndun úrgangs og stuðla að betri orkunýtingu. Félagið hefur einsett sér að ganga um landið af virðingu, með umhverfisvernd að leiðarljósi. Þannig er ávallt leitast við að framkvæmdir á vegum félagsins valdi sem minnstu umhverfisraski. Sýn hf. hefur sett sér það markmið að flokka allt sorp sem fellur til í starfseminni, auka þannig endurvinnslu og draga úr ónauðsynlegri urðun á sorpi. Leitast er við að lágmarka notkun á óendurnýjanlegum auðlindum og losun skaðlegra efna út í umhverfið eins og kostur er.

Á árinu fluttist öll sameinuð starfsemi félagsins í höfuðstöðvar Sýnar hf. að Suðurlandsbraut 8-10. Lögð er áhersla á heilbrigði  og vellíðan starfsmanna á vinnustaðnum. Í höfuðstöðvum félagsins er mikið lagt upp úr góðri hljóðvist, loftræstingu og birtuskilyrðum og má þar nefna að eingöngu er notast við LED perur í skrifstofurýminu með tilliti til endingar, ljósgæða, hagkvæmni og áhrifa á umhverfið. Fræðsla til starfsfólks um mikilvægi flokkunar á sorpi var aukin, auk þess sem flokkunartunnum var fjölgað og gerðar sýnilegri. Keyptir voru minni matardiskar með það að markmiði að draga úr matarsóun sem skilaði árangri. Hlutfall tvíhliða prentunar jókst umtalsvert eftir að prentarastillingum var breytt. Sýn hf. styður starfsfólk til að stunda vistvænar samgöngur t.d. með því að veita samgöngustyrk sem fólk er duglegt að nýta sér, almenningssamgöngur eru mjög aðgengilegar frá Suðurlandsbrautinni. Einnig er boðið upp á hleðslustöðvar fyrir rafbíla, læsta hjólageymslu og framúrskarandi búningsaðstöðu.

Stjórnarhættir  

Stjórnarhættir Sýnar hf. taka mið af lögum nr. 2/1995 um hlutafélög, lögum nr. 108/2007 um verðbréfaviðskipti, lögum nr. 81/2003 um fjarskipti, lögum nr. 38/2011 um fjölmiðla og öðrum almennum lögum sem gilda um starfsemina, reglum um útgefendur fjármálagerninga, samþykktum félagsins, starfsreglum stjórnar og einstakra undirnefnda stjórnar.

• Lögin má nálgast á vef Alþingis, www.althingi.is, en samþykktir og reglur félagsins á www.syn.is.  

Félagið hefur verið vottað fyrirmyndarfyrirtæki í góðum stjórnarháttum og fylgir leiðbeiningum um stjórnarhætti fyrirtækja sem hægt er að nálgast á heimasíðu Viðskiptaráðs Íslands, www.vi.is. Sýn hf. hefur einnig fengið vottað og staðfest að stjórnkerfi fyrirtækisins fyrir upplýsingaöryggi samræmist alþjóðlega upplýsingaöryggisstaðlinum ISO 27001. Þá hefur fyrirtækið fengið Hvatningarverðlaun jafnréttismála.  

Nokkrir áhættuþættir í starfsemi félagsins eru erlend og innlend samkeppni og tæknibreytingar sem geta leitt af sér fækkun viðskiptavina og lækkun verðs. Félagið veitir um 550 manns atvinnu og því hefur þróun launa á Íslandi mikil áhrif á rekstur félagsins. Félagið er þjónustufyrirtæki og því hafa þættir sem hafa áhrif á viðskiptavini félagsins; svo sem hagvöxtur, neyslustig og kaupmáttur áhrif á rekstur félagsins. Félagið kaupir aðföng fyrir meira en 3 ma. kr. í erlendri mynt á hverju ári og því hefur gengi íslensku krónunnar talsverð áhrif á rekstur félagsins.    

Að ofan hefur verið lýst helstu ófjárhagslegu lykilmælikvörðum félagsins og þeim megináhættum sem tengjast þessum málum í rekstri félagsins. Sýn hf. hefur komið sér upp gildum, ferlum og skipulagi til að koma í veg fyrir að félagið valdi skaða með starfsemi sinni. Félagið stundar ábyrga stjórnarhætti með það að markmiði að styrkja innviði Sýnar hf. og auka gagnsæi.  

Félagið vinnur eftir skýrum siðareglum með hagsmuni viðskiptavina, starfsfólks, hluthafa sem og samfélagsins alls að leiðarljósi. Siðareglur Sýnar hf. fela í sér siðferðisleg viðmið starfsmanna og leiðbeiningar um viðbrögð við siðferðislegum álitamálum. Fyrirtækið virðir einkalíf viðskiptavina í einu og öllu og hefur persónuverndarsjónarmið í huga þegar vörur og þjónustur eru þróaðar. 

Umhverfi

Samfélag

Stjórnarhættir